صیہونی حملے، 24 گھنٹوں کے دوران نہتے خواتین و بچوں سمیت 44 فلسطینی شہید

غزہ : غزہ میں صیہونی فوج کے حملوں میں چوبیس گھنٹوں کے دوران چوالیس فلسطینی شہید اور چوہتر زخمی ہوگئے۔ اسرائیلی جنگی طیاروں نے البریج کیمپ پر حملے میں پچیس فلسطینیوں کو شہید کردیا۔ وسطیٰ غزہ میں مختلف مقامات پر حملوں میں بھی کئی فلسطینی شہید ہوئے نصیرات میں طبی عملے کی گاڑی پر میزائل حملے میں ایک رضاکار سمیت تین فلسطینی شہید ہوگئے۔ رفح کے مضافاتی علاقے الجنینا میں صیہونی فوج نے بمباری کرکے کئی مکانات کو تباہ کردیا جس میں کئی قیمتی جانیں ضائع ہوئیں۔ شہدا میں زیادہ تر خواتین اور بچے ہیں۔ انڈونیشین اسپتال پر تازہ حملے میں چھ مریض زخمی ہوئے جس میں سے ایک کی حالت نازک ہے۔
ادھر اقوام متحدہ کے کے ادارہ برائے فلسطینی پناہ گزین انروا نے خبردار کیا ہے کہ جنگ زدہ غزہ میں تقریباً 10 لاکھ بے گھر فلسطینی اس موسم سرما میں شدید سردی اور بارش کے خطرے سے دوچار ہیں۔ انروا نے ایک بیان میں کہا ہے کہ غزہ میں بے گھر لوگوں کو بارش اور سردی سے تحفظ کی ضرورت ہے۔ لیکن صرف تئیس فیصد کی ان ضرویات کو پورا کیا جاسکا ہے۔