آپ طاقتور اور دشمن کمزور ہو رہاہے مگر وہ طاقتور ہونے کا جھوٹا دعویٰ کرتا ہے، ولی امر مسلمین

تہران : ولی امر مسلمین آیت اللہ سید علی خامنہ ای نے کہا ہے کہ امریکہ نے ایران کے بارے میں ہمیشہ غلط اندازے لگائے اور دھوکے کا شکار ہوا۔ قم سے تعلق رکھنے والی عوام کے اجتماع سے خطاب میں ولی امر مسلمین نےکہا کہ پہلوی دور میں ایران امریکی مفادات کا قلعہ تھا اور اسی سے انقلاب نے جنم لیا۔ امریکیوں نے یہ بات سمجھنے میں غلطی کی اور دھوکہ کھایا۔ یہی امریکہ کی بڑی غلطی تھی۔ انہوں نے کہا کہ میرا یہ پیغام خاص طور پر ان لوگوں کے لیے ہے جو امریکی پالیسیوں سے مرعوب ہوجاتے ہیں۔ سرد جنگ کا مطلب جھوٹ پر مبنی پروپیگنڈا ہے۔ جس میں حقیقت کو پنہاں کیا جاتا ہے تاکہ زمینی حقائق اور رائے عامہ کے درمیان فاصلہ پیدا ہوجائے۔ آپ طاقتور ہو رہے ہیں لیکن دشمن پروپیگنڈا کرتا ہے کہ آپ کمزور ہو رہے ہیں۔ دشمن خود کمزور ہو رہا ہے مگر دعویٰ کرتا ہے کہ وہ طاقتور ہو رہا ہے۔ آیت اللہ خامنہ ای نے کہا کہ سرد جنگ میں دشمن آپ کو ناقابلِ تسخیر دیکھ کر بھڑکیں مارتا ہے اور نابود کرنے کی کھوکھلی دھمکی دیتا ہے۔ یہ سب پروپیگنڈا اور سرد جنگ کا حصہ ہیں اور کچھ لوگ ان کے زیر اثر آجاتے ہیں۔ انہوں نےکہاکہ امریکہ ایران کے انقلاب کے نتیجے میں ایک بڑی سیاسی اور اقتصادی دولت کھو چکا ہے۔ اور اس نے ایران کو اسلامی انقلاب کی گرفت سے نکالنے کے لیے گزشتہ 40 سالوں میں بہت زیادہ دولت خرچ کی ہے۔ لیکن وہ ناکام رہا ہے۔
انہوں نے مزید کہا کہ امریکہ اپنی شکست کی تلافی کر رہا ہے۔ اس لیے وہ ایران کے ساتھ ہر طرح کی دشمنی کا سہارا لیتا ہے۔ انہوں نے کہا کہ امریکہ نے ایران کو اپنے قبضے میں لے لیا تھا، لیکن انقلاب اسلامی نے ملک کو اس کی گرفت اور کنٹرول سے چھین لیا گیا۔ لہذا، اسلامی جمہوریہ اور انقلاب کے تئیں اس کی نفرت دیرینہ ہے۔ انہوں نے کہا کہ امریکا آسانی سے جانے نہیں دے گا۔ اسے ایران میں شکست کا سامنا کرنا پڑا ہے اور وہ اس کا ازالہ کرنا چاہتا ہے۔