کیلیفورنیا میں بس پر فائرنگ سے خاتون ہلاک

اوروویل : امریکی ریاست کیلیفورنیا کے شہر اوروویل میں بس پر فائرنگ سے خاتون ہلاک جبکہ 4 افراد زخمی ہوگئے۔ ملزم کو برہنہ حالت میں گرفتار کرلیا گیا۔ 21 سالہ اساہدی کولمین نے اس وقت لاس اینجلس جانے والی بس پر فائرنگ شروع کر دی جب وہ ایک اسٹور پر رکی اور مسافر باہر نکل رہے تھے۔ بس سے درجن بھر نائن ایم ایم کے خول برآمد ہوئے جبکہ حملہ آور سے ہتھیار بھی برآمد کر لیا گیا ہے۔ شیرف ہونیا کا مزید کہنا تھا کہ گولیاں چلانے سے قبل کولمین بس پر چڑھا اور مسافروں کو یہ کہتے ہوئے ہتھیار دکھایا کہ لاس اینجلس ایک خطرناک شہر ہے، وہ یکدم غصے میں آیا اور بس میں سوار ایک مسافر کو خفیہ ادارے کا اہلکار قرار دیا۔گولیاں چلانے کے بعد کولمین وہاں سے فرار ہو گیا اور نصف میل دور جا کے ایک شخص کے ساتھ جھگڑا شروع کر دیا، لوگوں نے چھڑایا تو اس نے کپڑے اتارنا شروع کر دیے، تاہم تھوڑی دیر بعد ہی پولیس نے موقع پر پہنچ کر اس کو برہنہ حالت میں گرفتار کیا گیا۔ بیوٹ کاؤنٹی کے ڈسٹرکٹ اٹارنی ڈیوڈ رمسی کا کہنا ہے کہ حملہ آور کولمین کم عمری میں مجرمانہ سرگرمیوں میں ملوث ہونے کا ریکارڈ رکھتا ہے جبکہ غیرقانونی اسلحہ رکھنے پر بھی وہ پولیس کو مطلوب تھا۔ریکارڈ کے مطابق کولمین کے کاغذات میں ساکرامنٹو کے ایک اپارٹمنٹ کا پتہ درج ہے۔