پی ٹی آئی کا لانگ مارچ رواں دواں، حکومت نے بات چیت کیلئے کمیٹی بنادی

اسلام آباد : وزیراعظم شہباز شریف نے تحریک انصاف کے لانگ مارچ سے متعلق وفاقی کابینہ کی کمیٹی تشکیل دے دی۔ سابق وزیراعظم عمران خان کی زیر قیادت حکومت کیخلاف لانگ مارچ جاری ہے۔ مارچ کے شرکا دوسرے دن شاہدرہ سے روانہ ہوئے۔ شرکاء فیروزوالا، مرید کے۔ سادھوکی۔ اور کامونکی سمیت جہاں بھی پہنچے بھرپور استقبال کیا گیا۔ عمران خان نے مختلف مقامات پر خطاب کیا اور کہا کہ چور ڈاکوؤں کے ہینڈلرز کو کبھی قبول نہیں کریں گے، صاف شفاف الیکشن چاہتے ہیں۔عوام کو فیصلہ کرنے دیں۔۔ ادھرحکومت نے تحریک انصاف سے بات چیت کیلئے نو رکنی وفاقی کابینہ کی کمیٹی تشکیل دے دی۔ کابینہ کی نو رکنی کمیٹی وفاقی وزیرِداخلہ رانا ثناء اللّٰہ کی زیرِ صدارت بنائی گئی ہے۔ حکومت میں شامل اتحادی جماعتوں سے تعلق رکھنے والے وزیر کمیٹی میں شامل ہیں۔ کمیٹی میں ایاز صادق، خواجہ سعد رفیق، قمر زمان کائرہ، خالد مقبول صدیقی، میاں افتخار، مولانا اسعد اور مریم اورنگزیب بھی شامل ہیں۔ وزیرِ اعظم شہباز شریف نے کہا ہے کہ ہم جمہوری لوگ ہیں ،بات چیت کے لیے تیار ہیں، کسی کو قانون ہاتھ میں نہیں لینے دیں گے۔