Raza Musani 
تل ابیب: اسرائیلی وزیراعظم نیتن یاہو اور وزرا نے صیہونی آبادکاروں پر پابندیوں کی مذمت کرتے ہوئے یورپی یونین کو یہود دشمن قرار دے دیا۔ اسرائیلی وزیر اعظم نیتن یاہو نے یورپی یونین کی پابندیوں کی مذمت کرتے ہوئے انہیں ناقابل قبول قرار دیا ہے۔ نیتن یاہو کے دفتر نے کہا کہ اسرائیل اپنے آبائی وطن کے قلب میں یہودیوں کے رہنے کے حق کا ہمیشہ تحفظ کرتا رہے گا۔ بیان میں مزید کہا گیا کہ اسرائیلی شہریوں پر پابندیاں عائد کرنے کی یورپی یونین کی کوششیں دراصل اس کی کمزوری کی علامت ہیں اور وہ اپنے مقصد میں کامیاب نہیں ہوں گی۔ ادھر قومی سلامتی کے وزیر اتمار بن گویر نے اپنے بیان میں کہا کہ یورپی ممالک صرف اسرائیلیوں کو نشانہ بنا رہے ہیں جبکہ ان کے خلاف ہونے والے حملوں کو نظر انداز کیا جا رہا ہے۔ اتمار بن گویر نے کہا کہ آبادکاری کا منصوبہ کسی دباؤ یا پابندی سے نہیں رکے گا اور اسرائیل پوری سرزمین اسرائیل میں تعمیر، شجرکاری، دفاع اور آبادکاری جاری رکھے گا۔
