Raza Musani 
پاراچنار: پارا چنار میں متحدہ عرب امارات سے ڈی پورٹ کیے گئے افراد نے احتجاجی نیوز کانفرنس میں کہا ہے کہ انہیں زبردستی مختلف جیلوں اور حوالاتوں میں بند رکھا گیا اور بغیر کسی مناسب وضاحت کے پاکستان واپس بھیجا گیا۔ پریس کانفرنس سے خطاب کرتے ہوئے متاثرہ افراد کا کہنا تھا کہ انہیں نہ صفائی ستھرائی کا موقع فراہم کیا گیا اور نہ ہی اپنا سامان ساتھ لینے کی اجازت دی گئی۔ انہوں نے الزام عائد کیا کہ ان کے ساتھ غیر مناسب رویہ اختیار کیا گیا اور اچانک ملک بدر کردیا گیا۔ ڈی پورٹ افراد نے کہا کہ وہ متحدہ عرب امارات کے قوانین کے مطابق کام کرتے رہے اور کسی غیر قانونی سرگرمی میں ملوث نہیں تھے۔ انہوں نے حکومت پاکستان سے مطالبہ کیا کہ ان کے ساتھ ہونے والے معاملے کی شفاف تحقیقات کرکے انصاف فراہم کیا جائے۔
متاثرین نے وزارت داخلہ کے حالیہ بیانات اور پریس کانفرنس کو حقائق کے منافی قرار دیتے ہوئے کہا کہ زمینی حقائق کو نظر انداز کیا جارہا ہے۔ اس موقع پر عمائدین نے بھی خطاب کرتے ہوئے مطالبہ کیا کہ پاکستانی سفارتخانہ متحدہ عرب امارات میں موجود پاکستانی شہریوں اور ڈی پورٹ افراد کے مسائل کے حل کیلئے فوری اور مؤثر اقدامات اٹھائے تاکہ مزید پاکستانی شہری مشکلات سے محفوظ رہ سکیں۔
