Raza Musani 
لندن: ایمنسٹی انٹرنیشنل نے اسرائیل کی جانب سے مشرقی غزہ میں گھروں اور کھیتوں کو مسمار کرنے پر جنگی جرائم کی تحقیقات پر زور دیا ہے۔ انسانی حقوق کے ادارے ایمنسٹی انٹرنیشنل نے کہا ہےکہ بلڈوزر اور دھماکہ خیز مواد کے ذریعے اسرائیلی فوج نے مشرقی غزہ میں زرعی اراضی اور شہری عمارات تباہ کر دی ہیں اور گھروں، اسکولوں اور مساجد سمیت پورے کے پورے محلوں کو مسمار کر دیا ہے۔ ایمنسٹی انٹرنیشنل نے کہا ہے کہ اس مسماری کا مقصد اسرائیل اور فلسطینی سرزمین کے درمیان ایک نام نہاد بفر زون کو وسعت دینا ہے۔ سات اکتوبر سے جاری مسماری کی جنگی جرائم اور اجتماعی سزا کے طورپر تفتیش ہونی چاہیے۔ ایمنسٹی کے مطابق غزہ کی مشرقی سرحد کے ساتھ عمارات مسمار کر کے نئی برابر کی گئی زمین کی چوڑائی تقریباً ایک سے پونے دو کلومیٹر تک ہے اور توسیع شدہ یہ بفر زون تقریباً 58 مربع کلو میٹر پر محیط ہے۔
