ہندو انتہا پسندوں کا تشدد، ایک مسلمان قتل اور دوسرا زخمی

نئی دہلی : ہندوستان کے صوبے ہریانہ میں ہندوانتہا پسندوں نے مار مار کر ایک مسلمان کو قتل اور دوسرے کو زخمی کردیا۔ ہریانہ کے چرخی دادری ضلع میں مغربی بنگال سے تعلق رکھنے والے تارکین وطن صابر ملک کو گائے کا گوشت کھانے کے شک میں شدید تشدد کا نشانہ بنایا۔جس سے وہ موقع پر ہی دم توڑ گیا۔ پولیس نے پانچ افراد کو گرفتار کرلیا ہے جو گئو رکشک گروپ کا حصہ ہیں۔ پولیس کے مطابق ملزمان ابھیشیک، موہت، رویندر، کمل جیت اور ساحل کو شک تھا صابر نے گائے کا گوشت کھایا ہے۔ چنانچہ انہوں نے صابر کو پلاسٹک کی خالی بوتلیں بیچنے کے بہانے ایک دکان پر بلایا اور پھر اسے بری طرح زد و کوب کیا۔ کچھ لوگوں کی مداخلت کی تو ملزمان صابر ملک کو کسی دوسری جگہ لے گئے اور اسے دوبارہ مارا پیٹا، جس سے اس کی موت ہو گئی۔ادھرمہاراشٹر کے ناسک ضلع میں چلتی ٹرین میں بزرگ مسلمان کو بری طرح تشدد کا نشانہ بنایا۔ نام نہاد گئیو رکھشک کو شک تھا کہ حاجی اشرف منیار گائے کا گوشت لے جا رہا تھا۔ ویڈیو وائرل ہونے کے بعد پولیس نے مقدمہ درج کرلیا ہے۔