Raza Musani 
جدہ : سعودی عرب سمیت آٹھ اسلامی ممالک نے اسرائیل کے غزہ امن منصوبے کو مسترد کرنے پر شدید ردعمل کا اظہار کیا ہے۔ پاکستان، مصر، ترکیہ، انڈونیشیا، اردن، قطر، سعودی عرب اور متحدہ عرب امارات کے وزرائے خارجہ نے مشترکہ بیان میں کہا ہے کہ امن منصوبے کے روڈ میپ کو مسترد کرنا منصوبے پر عملدرآمد سے واضح انکار ہے۔ انہوں نے اسرائیل کے مؤقف کو جنگ کے خاتمے اور پائیدار امن کی کوششوں میں براہ راست رکاوٹ قرار دیا ہے اور امریکا سے مطالبہ کیا ہے کہ وہ اسرائیل کی جانب سے غزہ منصوبے پر مکمل عمل یقینی بنائے۔ بیان میں خبردار کیا گیا ہے کہ اسرائیل کے انکار، رکاوٹ یا تاخیر کے نتیجے میں پیدا ہونے والی صورتحال کی ذمہ داری بھی اسرائیل پر عائد ہوگی۔ انہوں نے کہا ہے کہ 1967 کی سرحدوں پر آزاد اور خودمختار فلسطینی ریاست کا قیام، ہی خطے میں پائیدار امن اور استحکام کی بنیاد بن سکتا ہے جس کا دارالحکومت مشرقی بیت المقدس ہو۔
