ایران کے خلاف امریکا اور اسرائیل کی جنگ غیر قانونی ہے، چین

بیجنگ : چین کے وزیرِ خارجہ وانگ یی نے ایران کے خلاف امریکا اور اسرائیل کی جنگ کو غیر قانونی قرار دیتے ہوئے فوری جنگ بندی پر زور دیا ہے۔ وانگ یی نے یہ بیان بیجنگ میں ایرانی وزیرِ خارجہ عباس عراقچی سے ملاقات کے دوران دیا۔ انہوں نےکہا کہ مشرقِ وسطیٰ اس وقت ایک فیصلہ کن موڑ پر کھڑا ہے اور خطے کے استحکام کے لیے مکمل جنگ بندی ناگزیر ہے۔ چینی وزیرِ خارجہ کا کہنا تھا کہ کشیدگی کم کرنے کے لیے دونوں فریقین کے درمیان براہِ راست مذاکرات انتہائی ضروری ہیں۔ وانگ یی نے خطے میں امن کے قیام کے لیے چین کے کردار اور کوششوں کو جاری رکھنے کے عزم کا اعادہ کیا۔ ایرانی وزیرِ خارجہ عباس عراقچی نے چین کے مؤقف کو سراہتے ہوئے اسے مضبوط اور اصولی قرار دیا۔ انہوں نے کہا کہ امریکا اور اسرائیل کی جنگ کی مذمت پر چین کا کردار قابلِ تحسین ہے۔ دونوں ممالک کاتعاون مستقبل میں مزید مضبوط ہوگا۔