وحدت اور باہمی اتحاد سے مسلمانوں کی قدرت میں اضافہ ہوگا، ایرانی صدر

تہران : ایرانی صدر مسعود پزشکیان نے کہا ہے کہ وحدت اور باہمی اتحاد سے مسلمانوں کی قدرت میں اضافہ ہوتا ہے۔ بین الاقوامی وحدت اسلامی کانفرنس سے خطاب میں انہوں نے کہا کہ انتخابات کے دوران ہم نے اتحاد کا نعرہ لگایا تھا۔ وحدت سے مسلمانوں کی طاقت میں اضافہ ہوتا ہے۔ انہوں نے کہا کہ پیغمبر اکرم صلی اللہ علیہ و آلہ وسلم نے مدینہ تشریف لے جاکر ان اقوام اور قبائل کے درمیان اتحاد اور وحدت ایجاد کی جو صدیوں سے ایک دوسرے سے لڑتے آرہے تھے اور ایک دوسرے کے جانی دشمن تھے۔ ایرانی صدر نےکہاکہ اتحاد کا نعرہ لگانا بہت آسان ہے۔ جب اقوام اور قبائل کے درمیان تنازع ہوجائے تو ایک دوسرے کے ساتھ صلح سے بیٹھنا بہت سخت ہے۔ تاہم مدینہ والوں نے عملی طور پر کردکھایا۔ انہوں نے کہا کہ دشمن نے ہمارے درمیان اختلافات اور تفرقہ ڈالا ہے۔ مسلمان نماز اور روزہ رکھتے ہیں لیکن ایک دوسرے سے لڑتے ہیں۔ ہمارے اختلافات کی وجہ سے اسرائیل لاکھوں مسلمانوں پر بمباری کرتا ہے کیونکہ ہمارے درمیان اتحاد نہیں ہے۔ اگر ہمارے درمیان عملی طور پر اتحاد قائم ہوجائے تو کوئی بھی ہمیں نقصان نہیں پہنچا سکتا ہے۔