Raza Musani 
بغداد: عراقی وزیر اعظم محمد شیاع السودانی نے کہاہے کہ رواں سال زائرین کی تعداد دو کروڑ تیس لاکھ تک پہنچ جائے گی۔ روزانہ ایک لاکھ چالیس ہزار سے زائد زائرین سرحدی گزرگاہوں کے ذریعے عراق میں داخل ہوتے ہیں۔ عراقی وزیراعظم نے وزارت داخلہ کے آپریشن روم کے دورے کے دوران خصوصی سیکورٹی پلان پر بریفنگ لی۔ انہوں نے عراقی سیکورٹی فورسز کے کمانڈروں کے ساتھ ملاقات کے دوران اربعین کے موقع پر زائرین کی حفاظت کو یقینی بنانے کے لئے ان فورسز کی کوششوں کو سراہا ۔ انہوں نے ہدایات جاری کیں کہ زائرین کی نقل و حرکت میں کسی قسم کی الجھن اور بدنظمی نہیں ہونی چاہیے۔ انہوں نے عراقی سکیورٹی اداروں سے خطاب کرتے ہوئے اس بات پر زور دیا کہ ملک میں خاص طور پر زائرین کے راستوں پر ٹریفک حادثات کی روک تھام کے لئے سکیورٹی فورسز کو زائرین کے تمام مقامات اور راستوں پر تعینات کیا جانا چاہیے۔
