مسلمانوں کا اتحاد بدخواہوں کی سازشوں کا مقابلہ کرنے کی کنجی ہے، ولی امر مسلمین

تہران : ولی امر مسلمین آیت اللہ العظمی سید علی خامنہ ای نے مسلمانوں کے اتحاد کو بدخواہوں کی سازشوں کا مقابلہ کرنے کی کنجی قرار دیا ہے۔ سنی علماء، دانشوروں اور معزز ہستیوں کے ایک گروپ سے ملاقات میں ولی امر مسلمین نے اسلامی اقتدار جیسے اہم ہدف کے حصول کو اتحاد کے علاوہ کسی اور راستے سے ناممکن قراردیا۔ انہوں نے اسلامی اتحاد کی اہمیت اور اسے کمزور کرنے کی مخاصمانہ کوششوں کا ذکر کرتے ہوئے کہا کہ اسلامی امت کی بات کو کبھی نہيں بھولنا چاہیے۔ انہوں نے کہا کہ اسلامی امت کا موضوع، بنیادی اور قومیت کے دائرے سے باہر کی چيز ہے اور جغرافیائی سرحدیں، اسلامی امت کی شناخت اور حقیقت کو بدلتی نہيں۔ ولی امر مسلمین نے اسلامی امت کی گراں قدر شناخت کی حفاظت کو ضروری قرار دیا اور کہاکہ لوگ ذہنی، تشہیراتی اور معاشی حربوں کا استعمال کر کے ہمارے ملک اور دیگر تمام اسلامی علاقوں میں شیعہ – سنی کو ایک دوسرے سے الگ کرنے کی کوشش کر رہے ہيں اور دونوں طرف سے کچھ لوگوں کو ایک دوسرے کو برا بھلا کہنے پر مامور کر کے ضد اور اختلافات کی آگ بھڑکاتے ہيں۔ آیت اللہ العظمی سید علی خامنہ ای نے ان سازشوں کے مقابلے کی واحد راہ کو اتحاد قرار دیا اور کہا کہ اتحاد حکمت عملی نہيں بلکہ قرآنی اصول ہے۔ آپ نے مسلمانوں کو اپنی اسلامی شناخت کی جانب سے لاپرواہ کرنے کے لئے دشمنوں کی مخاصمانہ کوششوں کا ذکر کرتے ہوئے کہا کہ یہ اسلامی تعلیمات کے خلاف ہے کہ کوئی مسلمان غزہ یا دنیا کے کسی بھی گوشے کے دوسرے مسلمان کے غموں سے غافل رہے۔