Raza Musani 
اسکردو : ایم ڈبلیو ایم گلگت بلتستان کے صدر آغا سید علی رضوی نے کہا ہے کہ ہم نے اپنے نمائندے سے سختی سے کہا ہے کہ وہ اسمبلی اور صوبائی کابینہ میں حکومت کی نہیں عوام کی نمائندگی کریں۔ ہماری جماعت کے تمام ارکان اسمبلی نے استعفیٰ لیکر میرے پاس جمع کروائے ہوئے ہیں، جس دن شیخ جعفری، سید باقر الحسینی اور گلگت سے آغا راحت و شیخ مرزا علی اور میرے عوام حکم دیں گے ہم اپنے نمائندوں سے استعفی لیں گے، مگر کام کرنے اور نہ کرنے والے نمائندوں میں تمیز کرنا ہوگی۔ انشاللہ صوبائی وزیر کاظم میثم کوئی کمزوری نہیں دکھائیں گے، وہ علمائے کرام اور عوام کو کبھی مایوس نہیں کریں گے۔اسکردو یادگار چوک پر جلسے سے خطاب کرتے ہوئے انہوں نے کہا کہ یادگار چوک پر جلسے میں پچھلے کئی دنوں سے اتحاد کا عملی مظاہرہ دیکھنے میں آ رہا ہے مگر کچھ لوگ ادھر ادھر کی باتیں کر رہے ہیں، ان سے کہنا چاہتا ہوں کہ وہ اتحاد کو خراب نہ کریں، کہنے کیلئے ہمارے سینے میں بھی بہت سارے راز پوشیدہ ہیں، ہم نہیں چاہتے ہیں جلسے کو خراب کریں۔ تمام لوگوں سے اپیل کرتا ہوں کہ وہ اتحاد کو برقرار رکھیں اور مثبت باتیں کریں۔ ہم انجمن تاجران کے صدر غلام حسین اطہر کے حکم کے تابع ہیں، سید باقر الحسینی اور میں نے صاف کہا ہے کہ انجمن تاجران جو حکم دے گی اس پر عمل کریں گے۔
