ویانا مذاکرات میں التوا کا براہ راست ذمہ دار امریکا ہے، ایران

تہران : ایران نے ویانا مذاکرات میں التوا کا براہ راست ذمہ دار امریکا کو قرار دیدیا۔ ایرانی وزیر خارجہ حسین امیر عبداللہیان نے جوہری معاہدے کے احیا کیلئے ویانا میں جاری مذاکرات کو ملتوی کرنے کا ذمہ دار امریکا کو ٹہراتے ہوئے کہا ہے کہ تہران ایک اچھے اور پائیدار معاہدے کے لیے تیار ہے۔عمانی وزیرخارجہ بدر البوسیدی کے ساتھ فون پر بات چیت کے دوران حسین امیر عبداللہیان نے ایرانی افراد اور کمپنیوں پر دوبارہ پابندیاں عائد کرنے پر تنقید کی۔ انہوں نے اس بات پر زور دیا کہ ایران ایک اچھے اور پائیدار معاہدے کے لیے تیار ہے، لیکن اب تک امریکی اپنے بعض ضرورت سے زیادہ مطالبات کی وجہ سے مذاکرات کو ملتوی کرنے کا براہ راست ذمہ دار ہے۔ فون پر بات چیت کے دوران امیر عبداللہیان اور البوسیدی نے دوطرفہ تعلقات اور علاقائی اور بین الاقوامی پیش رفت پر بھی تبادلہ خیال کیا، جس میں سعودی عرب کی قیادت میں فوجی اتحاد کے درمیان اقوام متحدہ کی ثالثی میں ہونے والی حالیہ جنگ بندی بھی شامل ہے۔