Raza Musani 
ابو ظہبی : متحدہ عرب امارات نے افغان طالبان کے سفیر کی اسناد سفارت قبول کرلیں۔ چین کے بعد دوسرا ملک ہے جس نے افغان سفیر کی اسناد قبول کی ہیں۔
کابل سے افغان میڈیا کے مطابق سفیر بدرالدین حقانی نے یو اے ای کے پروٹوکول امور کے نائب وزیر سیف عبداللّٰہ الشمسی کو اپنی اسناد پیش کیں۔ بدرالدین حقانی نے کہا کہ افغانستان اور متحدہ عرب امارات کے درمیان قیمتی اور تاریخی تعلقات ہیں۔ افغان وزارت خارجہ کا کہنا ہے کہ سفیر بدرالدین حقانی جلد باضابطہ تقریب میں متحدہ عرب امارات کے صدر کو باضابطہ طور پر اپنی اسناد سفارت پیش کریں گے۔
ادھر طالبان حکومت نے اقوامِ متحدہ کے افغانستان میں انسانی حقوق کے خصوصی نمائندے رچرڈ بینیٹ پر طالبان حکومت کے خلاف منفی پروپیگنڈے اور غلط رپورٹ مرتب کرنے پر افغانستان میں داخلے پر پابندی لگادی اور ویزہ جاری کرنے سے انکار کردیا۔ رچرڈ بینیٹ نےکہا ہے کہ طالبان نے ان کے ملک میں داخلے پر پابندی عائد کرکے دنیا کو ایک پریشان کن پیغام دیا ہے۔انہوں نے طالبان سے ملک میں داخلے پر پابندی کو واپس لینے کا مطالبہ کرتے ہوئے اس عزم کا بھی اظہار کیا کہ وہ انسانی حقوق کی خلاف ورزیوں کو دستاویزی شکل دیتے رہیں گے۔
