معاشی دباؤ کا حربہ پرانا ہے، ایران مقابلہ کرنا جانتا ہے، عراقچی

تہران : ایرانی وزیر خارجہ عباس عراقچی نے امریکی معاشی دباؤ کو پرانا حربہ قرار دیتے ہوئے کہا ہے کہ ایران ایسی پابندیوں کا مقابلہ کرنا جانتا ہے۔ انہوں نے واشنگٹن کو دھمکیوں کے بجائے احترام اور انصاف کی بنیاد پر مذاکرات کی دعوت دی۔ ایرانی وزیر خارجہ عباس عراقچی نے امریکا کی جانب سے نئی معاشی پابندیوں کی دھمکیوں کو مایوسی کی علامت قرار دیا ہے۔ انہوں نے کہا کہ واشنگٹن فوجی کارروائیوں سے معاشی جنگ کی طرف منتقل ہو رہا ہے، جو ایران کے لیے کوئی نیا تجربہ نہیں۔ عراقچی کے مطابق ایران ماضی میں بھی پابندیوں، ناکہ بندیوں اور دیگر دباؤ کا سامنا کر چکا ہے اور ان کا مقابلہ کرنا جانتا ہے۔ انہوں نے کہا کہ امریکا کی سابقہ فوجی اور معاشی کوششیں ناکام رہی ہیں اور نئی معاشی مہم بھی ناکام ہوگی۔ ایرانی وزیر خارجہ نے امریکا پر زور دیا کہ وہ دھمکیوں کے بجائے احترام، انصاف اور وقار کی بنیاد پر حل تلاش کرے۔ ادھر امریکا ایران پر تاریخ کی سخت ترین پابندیاں عائد کرنے کی تیاری کر رہا ہے، جس سے دونوں ممالک کے درمیان کشیدگی مزید بڑھ گئی ہے۔