مولانا عباس انصاری کی جدوجہد و قربانی کو کبھی فراموش نہیں کیا جاسکتا، ایم ڈبلیو ایم، شیعہ علما کونسل

اسلام آباد : مجلس وحدت مسلمین پاکستان اور شیعہ علما کونسل نے ممتاز عالم دین اور کشمیری حریت رہنما مولانا محمد عباس انصاری کی ناگہانی وفات پر افسوس اور تعزیت کا اظہار کیا ہے۔ ایم ڈبلیو ایم کے سربراہ علامہ راہ ناصر عباس جعفری نے کہاکہ مولانا محمد عباس انصاری تحریک آزادی کشمیر کے صف اول کے رہنما تھے، انہوں نے بھارتی جبر وتسلط کے خلاف ہمیشہ کلمہ حق بلند کیا۔مرحوم ہمیشہ بھارتی قابض افواج کے ظلم و بربریت کے مقابل آہنی دیوار بنےرہے۔ کئی مرتبہ قید وبند کی صعوبتیں بھی جھیلیں لیکن ان کے پایہ ثبات میں کبھی لغزش نہیں آئی۔ حریت رہنما مولانا عباس انصاری کی جدوجہد وقربانیوں کو کبھی فراموش نہیں کیا جاسکتا۔ شیعہ علماء کونسل پاکستان کے مرکزی نائب صدر علامہ عارف حسین واحدی نے کہا ہے کہ مرحوم نے ساری زندگی آزادی کشمیر کے لئے جدوجہد کی جو انتہائی لائق تحسین ہے، انشاء اللہ ان کی اور دیگر کشمیری مجاہدین کی کوششیں اور کاوشین رنگ لائیں گی اور کشمیر انڈیا کے ظلم و بربریت سے نجات حاصل کرے گا، دعاگو ہیں اللہ تعالی مولانا انصاری مرحوم کو ان کی زحمات کا بہترین اجر عطا فرمائے اور ان کو مغفرت اور جنت الفردوس میں بلند درجات عطا فرمائے۔