غزہ کی صورتحال مایوس کن و المناک ہوچکی ہے، اقوام متحدہ

جنیوا : اقوام متحدہ نے غزہ میں فوری جنگ بندی کا مطالبہ کیا ہے اور غزہ کی صورتحال کو مایوس کن و المناک قرار دیا ہے. اقوام متحدہ کے ادارہ برائے بحالی و امداد انروا کے سربراہ فلیپس لازارینی نے کہا ہے کہ دنیا کو معلوم ہونا چاہئے کہ غزہ میں بھی انسان رہتے ہیں جو زندگی اور بہتر مستقبل کے خواب سجاتے ہیں۔ افسوس کے اس وقت غزہ میں تباہ حال عمارتوں اور سسکتی زندگیوں کے سوا کچھ بھی نہیں بچا ہے۔ فلیپس لازارینی نے کہا کہ غزہ میں ہر طرف بس تباہی اور موت ہے۔ غزہ میں بھوک اور بیماریاں اسرائیلی بموں کی طرح ہی فلسطینیوں کی زندگیاں نگل رہی ہیں۔ رفح آپریشن کے بعد فلسطینیوں کے مسائل اور بڑھ گئے ہیں۔ جنگ بندی کی اشد ضرورت ہے اور جنگ بندی کے بعد بھی شاید کئی دہائیوں تک غزہ جنگ کے اثرات سے باہر نہیں نکل سکے گا۔