آبادکاروں کے حملے منظم منصوبے کا حصہ ہیں، ترجمان محمود عباس

رام اللہ : فلسطینی صدر محمود عباس کے ترجمان نبیل ابو ردینہ نے کہاہے کہ مغربی کنارے میں آباد کاروں کا تشدد صیہونی حکومت کے تصادم کو ہوا دینے کے منظم منصوبے کا حصہ ہے ۔ نبیل ابو ردینہ نے کہاہے کہ شمالی مغربی کنارے میں صیہونی فوج کے مسلسل چھاپوں، فوجی چوکیوں اور دروازوں کے ذریعے علاقے کو ٹکڑے ٹکڑے کرنے اور آباد کاروں کے حملوں کی سرکاری سرپرستی کے ذریعے تصادم کو ہوا دی جارہی ہے۔ جس کے نتائج کی ذمہ دار صیہونی حکومت ہوگی۔ انہوں نے امریکی انتظامیہ سے مطالبہ کیا کہ وہ فوری طور پر مداخلت کرے اور اسرائیل پر اپنی فوج اور آباد کار ملیشیاؤں کے جرائم کو روکنے کے لیے دباؤ ڈالے۔ انہوں نےخبردار کیا کہ اگر ان جرائم پر روک نہ لگائی گئی تو خطے کو مزید خطرناک صورت حال کا سامنا کرنا پڑے گا جس کے نتائج سب کو بھگتنا ہوں گے۔