اخلاقیات، جمہوریت اور انصاف کی رکھوالی قوم کرتی ہے، قوم برائی دیکھ کر خاموش رہے تو اپنا نقصان کرتی ہے، عمران خان

اسلام آباد : وزیراعظم عمران خان نے ریڈزون کے باہر افطار کے بعد احتجاج کا اعلان کیا ہے۔ عوام کے سوالات کا براہِ راست جواب دیتے ہوئے کہا کہ ضمیر فروشوں کے خلاف احتجاج میں خود بھی شرکت کروں گا۔ انہوں نے کہا کہ چھانگا مانگا کی اسی سیاست کی وجہ سے ہماری جمہوریت عوام کی نظر میں وقعت کھوچکی ہے، ملک کی اخلاقیات ،جمہوریت ،انصاف کی رکھوالی قوم کرتی ہے، اچھائی اور حق کیساتھ کھڑے ہونے کا حکم قرآن میں اللہ نے ہمیں دیا، جب قوم برائی دیکھ کر چپ کرکے بیٹھ جاتی ہے تو اپنا نقصان کرتی ہے۔
وزیراعظم نے مزید کہا کہ 5 ہفتے پہلے تحریک عدم اعتماد کا ڈراما شروع ہوا، یہ بیرونی سازش بھی ہے جس کی وجہ سے اسپیکر نے رولنگ دی کیونکہ سازش کےتحت کہا گیا کہ وزیراعظم کو نہیں ہٹایا تو تعلقات خراب ہونگے۔
انہوں نے کہا کہ ایم ایز کو خرید کر دوسری حکومت بنانا کوئی جمہوریت نہیں ہے۔ خرید و فروخت اور بیرون سازش ملا کر یہ کرنا جمہوریت کو غیر مستحکم کرنے کی کوشش ہے۔ اس طرح کے حالات میں عوام کو احتجاج کرنا چاہیے۔ وزیراعظم عمران خان نے کہا ہے کہ اپوزیشن اقتدار میں آکر نیب کو ختم کرنا چاہتی ہے تاکہ انہیں این آر او 2 مل جائے اور ان پر کرپشن کے مقدمات ختم ہوجائیں اور یہ بھر سے ملک کا پیسہ باہر بھجوانا شروع کریں۔ ساڑھے تین سال سے اپوزیشن کہہ رہی تھی حکومت نا اہل ہے، یہ عوام میں جائیں گے تو عوام انہیں انڈے ماریں گے۔ ہم نے الیکشن کا اعلان کردیا ہے تو آپ سپریم کورٹ میں کیا کر رہے ہیں۔ انہوں ںے ساری زندگی فکس میچز کھیلے ہیں، ان کی پوری کوشش ہے کہ الیکشن کمیشن، بیوروکریسی اور سارا عملہ تیار کر کے پھر یہ الیکشن لڑیں۔