قوم حقیقی آزادی کیلئے جہاد کو تیار ہے، راستہ روکا تو انتشار پھیلے گا، عمران خان

پاکستان تحریک انصاف کے سربراہ اور سابق وزیراعظم عمران خان نے کہا ہے کہ امریکی سازش کے تحت 30 سال سے باریاں لینے والے جن چوروں کو ہمارے اوپر بٹھایا گیا ہے انہوں نے مہنگائی کے سارے ریکارڈ توڑ دیے ہیں، معیشت کا بیڑہ غرق کردیا ہے، ہم تنقید کرتے ہیں تو ہم پر مقدمات درج کیے جاتے ہیں مجھ پر 15 مقدمات درج ہیں لیکن کہتا ہوں کہ مجھ پر 1500 مقدمات بھی درج کرادو تو تمہارا پیچھا نہیں چھوڑوں گا۔ چیچہ وطنی کے جلسے میں شدید بارش کے باجود ہزاروں افراد عمران خان کا خطاب سننے کیلئے موجود تھے۔ عمران خان نےکہا کہ آج پیغام دیا جارہا ہے برائی کیخلاف کھڑے ہوگے تو جیلوں میں ڈالا جائیگا جب کہ اللہ تعالیٰ کا واضح حکم ہے کہ سچائی اور حق کیساتھ چلو اور برائی کیخلاف جہاد کرو، قوم کو پیغام دینا چاہتا ہوں کہ جو آج چوروں کیساتھ ہے ان کا بھی احتساب ہوگا، انہیں نہ کبھی قوم اور نہ ہی تاریخ معاف کرے گی۔ سابق وزیراعظم نے کہا کہ زیادہ وقت نہیں رہا ہے، لوگوں کا راستہ روکیں گے تو ملک کو انتشار کی طرف لے جائیں گے، پرامن احتجاج روکنے سے ملک کا حال سری لنکا جیسا ہوگا اس لیے لوگوں کو نہ ڈراؤ کیونکہ قوم اپنی حقیقی آزادی کیلئے جہاد لڑنے کیلئے تیار ہے اور اس معاملے میں یہ قوم بہت آگے نکل چکی ہے۔ سابق وزیراعظم نے کہا کہ عوام سے کہتا ہوں یہ دھاندلی کریں گے لیکن ہم نے انہیں دھاندلی نہیں کرنے دینی، عوام سے کہتا ہوں ہر پولنگ اسٹیشن پر جاکر ووٹر لسٹ کو چیک کریں اور اس کی تصدیق کریں، کیونکہ انہوں نے الیکشن کمیشن کے ساتھ مل کر دھاندلی کرنی ہے، مجھے ایسے نوجوان چاہئیں جو ان کو دھاندلی سے روکیں، ہر پولنگ اسٹیشن پر دلیر نوجوان چاہئیں جو کسی کو دھاندلی نہ کرنے دیں۔ عمران خان نے کہا کہ بے ضمیر الیکشن کمیشن ان کے ساتھ مل کر انہیں جتانے کی کوشش کررہا ہے، یہ جتنے بھی امپائر ساتھ ملالیں ہم پھر بھی انہیں شکست دیں گے، یہ چاہے کچھ بھی کرلیں17 جولائی کو 20 کی 20 نشستیں ہم جیتیں گے۔