مسلم دنیا کی غزہ میں اسکول پر وحشیانہ حملے کی شدید مذمت

جدہ : مسلم دنیا نے غزہ میں التابعین اسکول پر صیہونی فوج کے وحشیانہ حملے کی شدید مذمت کی ہے۔مصری وزارت خارجہ نے کہاہے کہ یہ حملہ تل ابیب کے جنگ روکنے کے حقیقی ارادے کی کمی کا مظہر ہے۔جب بھی جنگ بندی پر بات چیت کی کوششیں تیز ہوتی ہیں شہری ہلاکتوں میں اضافہ ہوجاتا ہے۔ اردن کی وزارت خارجہ کے ترجمان سفیان قداح نے حملے کو بین الاقوامی قانون اور انسانی اصولوں کی مسلسل خلاف ورزیوں میں سے ایک قرار دیا۔ سعودی وزارت خارجہ نے غزہ کی پٹی میں قتل عام کو روکنے کی فوری ضرورت پر زور دیا۔پاکستانی وزیر اعظم شہباز شریف نے کہاکہ اسرائیلی قیادت اور سیکیورٹی فورسز کو فلسطینیوں کی نسل کشی اور جنگی جرائم کے لیے انصاف کے کٹہرے میں لایا جائے۔ عراقی وزارت خارجہ نے کہا کہ اسرائیلی حملے جنگ بندی کی عالمی کوششوں پر خط تنسیخ پھیرنے کے مترداف ہیں۔
ایرانی وزارت خارجہ کے ترجمان ناصر کنعانی نے کہا کہ اسکول پر حملے سے پھر ثابت ہوگیا کہ اسرائیل بین الاقوامی قانون کا احترام کرتا ہے نہ انسانی اور اخلاقای اصولوں اور اقدارکا احترام کرتا ہے۔ ترک وزارت خارجہ نےکہا ہے کہ اسرائیل نے انسانیت کیخلاف جرائم کا ارتکاب کیا ہے۔