ثالث اور ضامن اسرائیلی حملے روکنے میں ناکام رہے ہیں، حماس

حماس نے غزہ میں قتل عام کی مذمت کرتے ہوئے کہا ہےکہ اسرائیلی حملے ثبوت ہیں کہ جنگ بندی کے ثالث اور ضامن دشمن کے جرائم کو لگام دینے میں بری طرح ناکام رہے ہیں۔ حماس کے ترجمان حاذم قاسم نے ایک بیان میں تازہ واقعات کو صیہونی ریاست کی خونی جارحیت اور مکمل جنگی جرائم قرار دیا اور واضح کیا کہ یہ اس خونی روش اور بے مثال فسطائیت کی عکاسی ہے جو نتائج کی پرواہ کیے بغیر پوری دنیا کی آنکھوں کے سامنے برتی جا رہی ہے۔ حماس نے عالمی برادری اور تمام متعلقہ فریقوں سے مطالبہ کیا کہ وہ فلسطینی عوام کے تحفظ کے لیے فوری حرکت میں آئیں اور قابض اسرائیل کی حکومت پر دباؤ ڈالیں کہ وہ سیز فائر معاہدے کے تحت اپنی ذمہ داریوں کو پورا کرے۔