مجلس وحدت مسلمین کے تحت تکریم شہداء کانفرنس 12 جون کو اسکردو میں منعقد ہوگی

اسکردو : صوبائی سیکرٹریٹ ایم ڈبلیو ایم بلتستان اسکردو میں صوبائی اور ضلعی کابینہ کا مشترکہ اجلاس ہوا۔ اجلاس میں ضلع اسکردو، ضلع شگر، ضلع کھرمنگ اور روندو کی ضلعی کابینہ سمیت کارکنان کی بڑی تعداد نے شرکت کی۔ اجلاس سے خطاب کرتے ہوئے ایم ڈبلیو ایم کے صوبائی سربراہ آغا علی رضوی نے 12 جون کو یادگار شہداء پر تکریم شہداء اور استحکام پاکستان کے عنوان سے ایک عظیم الشان کانفرنس منعقد کرنے کا اعلان کیا۔ اجلاس میں شریک علماء کرام نے برسی امام راحل خمینی بت شکن کی مناسبت سے آپ کے کردار پر سیر حاصل گفتگو کی۔اجلاس کے دوران علماء کرام، نوجوانان اور تنظیمی عہدہ داران نے مجاہد ملت سید علی رضوی سے تجدید عہد کرتے ہوئے آپ کی والہانہ قیادت میں ہمیشہ کی طرح ہر قسم کے ظلم، ناانصافی اور کرپشن کے خلاف جدوجہد جاری رکھنے کا اعلان کیا۔ جامعہ بلتستان کے نااہل وی سی کے حوالے سے آغا علی رضوی کے موقف کی بھرپور تائید کرتے ہوئے متنازعہ وی سی کی دوبارہ ممکنہ تعیناتی کو مسترد کیا گیا اور ایک قابل اور دیانت دار وی سی کی تعیناتی تک جدوجہد جاری رکھنے کا اعلان کیا گیا۔