غزہ میں انسانی صورتحال انتہائی سنگین ہو چکی ہے، اوچا

جنیوا : اقوام متحدہ کے ادارے اوچا نے خبردار کیا ہے کہ غزہ میں انسانی صورتحال انتہائی سنگین ہو چکی ہے۔ شہری آبادی مسلسل خطرات میں گھری ہوئی ہے۔ اوچا نے اپنی تازہ رپورٹ میں کہا ہے کہ غزہ میں رہائشی حالات بدستور انتہائی ابتر ہیں۔ زیادہ تر فلسطینی بے گھر ہیں اور مسلسل حملوں، بیماریوں اور ماحولیاتی خطرات کا سامنا کر رہے ہیں۔ رپورٹ کے مطابق اسرائیل کے زیر کنٹرول سرحدی راستوں پر امدادی سامان کی ترسیل شدید متاثر ہے اور مئی کے پہلے دس دنوں کے دوران مصر سے غزہ جانے والے ہر دو میں سے صرف ایک امدادی ٹرک ہی اپنا سامان اتارنے میں کامیاب ہو سکا۔ اوچا نے کہا کہ غزہ میں زیادہ تر فلسطینی بار بار نقل مکانی پر مجبور ہو چکے ہیں جبکہ رہائشی علاقوں پر مسلسل حملے جاری ہیں۔ ادارے کے مطابق صحت اور صفائی کی خراب صورتحال کے باعث بیماریوں اور ماحولیاتی خطرات میں بھی اضافہ ہو رہا ہے۔ رپورٹ میں کہا گیا کہ بحالی اور علاج کی سہولیات اپنی گنجائش سے کہیں زیادہ دباؤ کا سامنا کر رہی ہیں جبکہ طبی نظام مسلسل بحران کی کیفیت میں ہے۔