Raza Musani 
نیویارک : اقوام متحدہ نے مقبوضہ مشرقی القدس کے محلے شیخ جراح سے فلسطینی خاندانوں کو گھروں سے جبری بے دخل کرنے کی مذمت کرتے ہوئے صیہونی اقدام کو بین الاقوامی قوانین کی خلاف ورزی قرار دیا ہے۔ اقوام متحدہ کے سیکریٹری جنرل انتونیو گوٹیرس کے ترجمان اسٹیفن ڈوجارک نے نیوز کانفرنس میں بتایا کہ اقوام متحدہ کے ایک وفد نے مقبوضہ فلسطینی علاقوں کا دورہ کیا اور فلسطینی خاندانوں سے ملاقات کی جسے بے دخلی کا سامنا ہے۔ جارک نے کہا کہ اقوام متحدہ نے متعدد بار مقبوضہ مغربی کنارے اور مشرقی القدس میں مکانات کی جبری بے دخلی اور مسماری کے خاتمے کا مطالبہ کیا ہے۔ بین الاقوامی انسانی قانون کے تحت اسرائیلی فورسز کو محفوظ افراد کو زبردستی ملک بدر کرنے سے منع کیا گیا ہے، چاہے اس طرح کی ملک بدری کے پیچھے کوئی بھی مقصد ہو۔ دجارک نے صیہونی حکام سے مزید مطالبہ کیا کہ فلسطینی پناہ گزینوں سمیت شہریوں کے تحفظ کے لیے ضروری اقدامات کریں۔
