فلسطینی ریاست کا قیام مسئلہ فلسطین کا واحد حل ہے، پیوٹن

ماسکو : روسی صدر پیوٹن نے اسرائیل فلسطین مسئلے کا واحد حل فلسطینی ریاست کے قیام کو قرار دیا ہے۔ ماسکو میں قطر کے امیر شیخ تمیم بن حمد الثانی سے ملاقات میں روسی صدر نے کہا کہ غزہ میں پُرامن لوگوں کی اموات جاری رہنا آج کا المیہ ہے۔ پیوٹن نے قطر کی تنازعہ کو حل کرنے کی سنجیدہ کوششوں کو تسلیم کیا ۔ انہوں نے کہا کہ طویل مدتی تصفیہ صرف اقوام متحدہ کی قرارداد کی بنیاد پر حاصل کیا جا سکتا ہے اور یہ دو ریاستوں کے قیام سے منسلک ہے۔
امیر قطر نے کہا کہ اسرائیل غزہ جنگ بندی معاہدے کی پاسداری کرنے میں ناکام رہا۔ ہمارا مؤقف واضح ہے کہ آزاد فلسطینی ریاست کے قیام کے بغیر امن ناممکن ہے۔ دونوں رہنماؤں نے شام کو آزاد، خود مختار اور متحد ریاست بنانے کی مشترکا کوششوں پر بھی اتفاق کیا۔