Raza Musani 
ملتان: وزیر خارجہ مخدوم شاہ محمود قریشی نے کہا ہے کہ اسلام فوبیا کے بڑھتے ہوئے رجحانات معاشرے کیلیے خطرناک اور زہر قاتل ہیں۔برصغیر کے عظیم روحانی پیشوا حضرت شاہ رکن عالم کے عرس کی اختتامی تقریب سے خطاب میں شاہ محمود قریشی نے کہا کہ بہت ساری قوتیں پاکستان کو کمزور دیکھنا چاہتی ہیں، ان کے خواب شرمندہ تعبیر نہیں ہوں گے۔ بہت سی قوتیں کشمیر اور فلسطین میں نہتے مسلمانوں پر ظلم کر رہی ہیں۔ ہمارا ہمسایہ ملک افغانستان بھی انتشار کا شکار ہے۔ ایک آزمائش ہمارے پڑوس افغانستان میں ہے،دور حاضر میں اتحاد امہ اور یکجہتی کی بہت زیادہ ضرورت ہے۔ وزیر خارجہ نے کہا کہ پاکستان مستحکم افغانستان دیکھنا چاہتا ہے اور اس مقصد کے لئے 19دسمبر کواسلام آباد میں وزیر اعظم عمران خان کی قیادت میں اسلامی ممالک کے وزراخارجہ کانفرنس منعقد کی جارہی ہے جس کا بنیادی مقصد افغانستان کی بہتری اور خوشحالی پر غور کرنا ہے، پاکستان نے بھارت سے آنے والوں کے لئے ویزہ پالیسی میں نرمی کردی ہے مگر بھارت ایسا نہیں کررہا۔
