Raza Musani 
ابوظہبی : عرب امارات نے فلسطینیوں کی پیٹھ میں ایک اور چھرا گھونپتے ہوئے صیہونی ریاست سے آزاد تجارتی معاہدے پر اتفاق کرلیا۔ صیہونی وزارت معیشت نے ایک بیان میں کہا ہے کہ تجارتی معاہدے میں 95 فی صد تجارتی مصنوعات شامل ہیں جو فوری یا بتدریج کسٹم فری ہوں گی۔ ان میں خوراک، زراعت اور کاسمیٹک مصنوعات کے علاوہ طبّی آلات اور ادویہ بھی شامل ہیں۔ معاہدے میں ریگولیشن، کسٹمز، سروسز، سرکاری خریداری اور برقی تجارت شامل ہے اور یہ اس وقت نافذ العمل ہوگا جب دونوں ملکوں کے اقتصادی امور کے وزرا اس پر دست خط کردیں گے اور اس کی توثیق کی جائے گی تاہم اس کا کوئی نظام الاوقات نہیں دیا گیا ہے۔ متحدہ عرب امارات کے وزیر مملکت برائے خارجہ تجارت ثانی الزیودی نے ٹویٹر پر کہاکہ سنگِ میل کی حیثیت کا حامل یہ معاہدہ تاریخی ابراہیم معاہدے پر استوار ہوگا اور دنیا کے اہم ترین اور امید افزا اُبھرتے ہوئے تجارتی تعلقات میں سےایک کو مستحکم کرے گا ۔
