غزہ میں جنگ بندی مذاق اور بے معنی ہے، اسرائیلی فوج کا اعتراف

واشنگٹن: امریکی نیوز ایجنسی اے پی کے مطابق غزہ میں تعینات اسرائیلی فوجیوں نے جنگ بندی کو بے معنی اور صورتحال کو انتہائی مہلک قرار دیا ہے۔ ایسوسی ایٹڈ پریس کو دیے گئے بیانات میں تین اسرائیلی فوجیوں نے نام ظاہر نہ کرنے کی شرط پر غزہ میں زمینی صورتحال کی سنگینی بیان کی ہے۔ انہوں نے بتایا کہ نام نہاد جنگ بندی کے باوجود فوجی کارروائیاں جاری ہیں اوریلو لائن کے قریب صورتحال انتہائی غیر واضح ہے۔
ایک فوجی نے بتایا کہ انہیں حکم دیا گیا کہ جو بھی یلو لکیر کو عبور کرے اس پر فائر کھول دیا جائے۔ کئی کارروائیاں فوری فیصلوں یا محدود معلومات اور اندازے کی بنیاد پر کی گئیں۔ ایک اور فوجی نے بتایا کہ ایک موقع پر انہوں نے فلسطینیوں سے بھری ایک گاڑی پر حملہ کر کے اس میں سوار ہر فرد کی ہلاکت کا جشن منایا۔ فوجی نے کہا کہ وہ ایک جنگل کا ماحول تھا۔ اسے جنگ بندی کہنا مذاق ہے۔
رپورٹ کے مطابق اکتوبر میں جنگ بندی کے بعد سے اب تک غزہ میں 900 سے زائد افراد، جن میں خواتین اور بچے شامل ہیں، جاں بحق ہو چکے ہیں۔