اسپتال کو آگ لگانا اسرائیل کے جاری جنگی جرائم اور نسل کشی کا حصہ ہے، او آئی سی

جدہ : اسلامی تعاون تنظیم او آئی سی، سعودی عرب، عرب امارات، اردن سمیت کئی ممالک نے کمال عدوان اسپتال کو آگ لگانے پر ہر بار کی طرح اسرائیل کی صرف رسمی زبانی مذمت کردی۔
او آئی سی نے ایک بیان میں کمال عدوان اسپتال پر حملے کو فلسطینی عوام کے خلاف اسرائیل کے جاری جنگی جرائم اور نسل کشی کا حصہ قرار دیا۔ او آئی سی نے اس بات پر زور دیا کہ اسپتالوں کو نشانہ بنانا، محاصرہ کرنا اور دھاوا بولنا اور طبی عملے، مریضوں اور زخمیوں کو حراست میں لینا بین الاقوامی انسانی قانون اور اقوام متحدہ کے متعلقہ معاہدوں اور قراردادوں کی صریح خلاف ورزی ہے۔ ادھر سعودی وزارت خارجہ نے ایک بیان میں کہا کہ اسپتال پر حملہ اور اسے نذر آتش کرنا بین الاقوامی قوانین کی صریح خلاف ورزی،بنیادی انسانی حقوق اور اخلاقی معیارات کی کھلی پامالی ہے۔ اردن ۔عرب امارات سمیت کئی ممالک نے بھی اسپتال پر صیہونی حملے کی مذمت کی ہے۔