بلغاریہ میں ٹرک سے 18 افغان تارکین وطن کی لاشیں برآمد

صوفیہ : یورپی ملک بلغاریہ کی پولیس نے دارالحکومت صوفیہ کے پاس ٹرک سے بچے سمیت 18 افغان تارکین وطن کی لاشیں دریافت ہونے کے بعد چار افراد کو گرفتار کر لیا ہے۔ بلغاریہ کی وزارت داخلہ نے ایک بیان میں کہا ہے کہ لوکورسکو گاؤں کے قریب ملنے والا ٹرک لکڑی اور کمپارٹمنٹس میں چھپے غیر قانونی تارکین وطن کو لے جا رہا تھا۔ تارکین وطن میں سے بعض کا دم گھٹ گیا۔نیشنل تحقیقاتی سروس کے سربراہ نے بتایا کہ تارکین وطن نے غیر قانونی طور پر ہمسایہ ملک ترکیہ کی سرحد عبور کی اور جنوب مشرقی بلغاریہ کے شہر یامبول کے قریب ٹرک پر چڑھنے سے قبل دو دن تک جنگل میں چھپے رہے۔ وزیر صحت آسن میدزیدیف نے کہا کہ پانچ بچوں سمیت 34 تارکین وطن کو صوفیہ کے اسپتالوں میں پہنچایا گیا جہاں ان کی حالت بہتر ہے۔ ٹرک میں بند ہونے والوں کو آکسیجن کی کمی کا سامنا تھا۔ وہ منجمد اور گیلے تھے، انہوں نے کئی دنوں سے کچھ نہیں کھایا تھا۔ایک سینیئر پولیس اہلکار اتاناس ایلکوف نے کہا کہ حراست میں لیے گئے چار افراد میں سے ایک کو پہلے ہی انسانی اسمگلنگ کے الزام میں سزا سنائی جا چکی ہے۔
ان کا کہنا تھا کہ مزید ثبوت ملنے پر الزامات عائد کیے جائیں گے۔ بلغاریہ اس راستے پر واقع ہے جسے مشرق وسطیٰ اور افغانستان سے آنے والے تارکین وطن یورپی یونین میں داخل ہونے کے لیے استعمال کرتے ہیں۔