کورونا کے خلاف جیت کا اعلان قبل از وقت ہے، عالمی ادارہ صحت

ویانا : عالمی ادارہ صحت کے سربراہ نے خبردار کیا ہے کہ کورونا کے خلاف جیت کا اعلان یا وبا کے روک تھام کی غرض سے جاری کوششوں کو روک دینا قبل از وقت ہے۔ ڈبلیو ایچ او کے سربراہ ٹیڈروس ادہانوم نے کہا کہ کورونا وائرس خطرناک ہے اور ہماری آنکھوں کے سامنے اس میں تبدیلیاں رونما ہو رہی ہیں۔ ٹیڈروس ادہانوم نے تشویش کا اظہار کرتے ہوئے کہا کہ چند ممالک میں یہ خیال پایا جاتا ہے کہ ویکسین کی موجودگی اور اومی کرون کے تیزی سے پھیلاؤ لیکن کم شدت کے باعث اس کو روکنا ناممکن ہے لہٰذا روک تھام کی مزید ضرورت نہیں ہے۔انہوں نے خبردار کیا کہ کورونا وائرس کے پھیلاؤ کا مطلب مزید ہلاکتیں ہیں۔ 10 ہفتے قبل اومی کرون کے جنوبی افریقہ میں سامنے آنے کے بعد سے اب تک نو کروڑ کیسز ڈبلیو ایچ او کو رپورٹ ہو چکے ہیں جو سال 2020 کے دوران رپورٹ ہونے والے کیسز سے زیادہ ہیں۔ اگرچہ نئے ویریئنٹ کی علامات معتدل ہیں لیکن مختلف ممالک میں اس سے ہونے والی ہلاکتوں کی تعداد میں اضافہ ہو رہا ہے۔ ہم کسی بھی ملک سے یہ نہیں کہہ رہے کہ وہ واپس لاک ڈاؤن نافذ کریں۔ لیکن ہم تمام ممالک سے یہ مطالبہ کرتے ہیں کہ وہ صرف ویکسین کے ذریعے ہی نہیں بلکہ تمام موجود طریقے استعمال کرتے ہوئے اپنے لوگوں کی حفاظت کریں۔ انہوں نے مزید کہا کہ اس وائرس میں تبدیلیاں رونما ہوتی رہیں گی، اس لیے تمام ممالک لوگوں کی ٹیسٹنگ کا عمل اور اس میں ہونے والی تبدیلوں پر نظر رکھیں۔