اسرائیلی صدر سے مذاکرات جاری ہیں، عین ممکن ہے کہ وہ ترکی کا دورہ کریں، طیب اردوان

انقرہ : ترک صدر نے اسرائیل سے تعلقات کی بحالی کا اشارہ دیدیا طیب اردوان نے اعتراف کیا کہ اس وقت صیہونی صدر ہرزوگ کے ساتھ مذاکرات جاری ہیں اور عین ممکن ہے کہ وہ ترکی کا دورہ کریں۔ سربیا کے صدر الیگزینڈر ووجچ سے ملاقات کے بعد مشترکہ نیوز کانفرنس میں ترک صدر نے اعتراف کیا کہ اس وقت اسرائیلی صدر ہرزوگ کے ساتھ ہمارے مذاکرات جاری ہیں صیہونی وزیراعظم نفتالی بینیٹ بھی ترکی کے ساتھ تعلقات کی بحالی کے معاملے پر مثبت موقف رکھتے ہیں اور ترکی کا ہدف بھی مثبت سوچ کے ساتھ کسی حتمی نتیجے پر پہنچنا ہے۔ بحیثیت سیاستدان ہم لڑائی جھگڑے نہیں بلکہ امن کا رجحان رکھتے ہیں۔ اگر خطے میں قیام امن کے لیے ’’پیٹرول‘‘ وسیلہ بن سکتا ہے تو ہم اسے استعمال کرینگے۔ تاہم انھوں نے یہ بھی واضح کیا کہ اگر پیٹرول امن کا وسیلہ نہیں بنتا تو ہر ملک اپنا فیصلہ کرنے میں آزاد ہیں، سب کی اپنی ترجیح ہوتی ہے لیکن یہ بھی بتا دیں کہ ہم نے ڈرلنگ اور بحری جہاز بے وجہ نہیں خریدے.