طالبان کا مغرب سے تعلقات استوار اور خواتین پر پابندیاں نظر انداز کرنے پر زور

دوحہ : افغان طالبان نے مغرب سے تعلقات استوار اور خواتین پر پابندیاں نظر انداز کرنے پر زور دیا ہے۔ اقوامِ متحدہ کے زیر اہتمام دوحہ کانفرنس سے خطاب میں طالبان ترجمان ذبیح اللہ مجاہد نے افغانستان کے منجمد بین الاقوامی فنڈ جاری کرنے پر زور دیا۔ انہوں نے کہا کہ افغانستان کے بینکنگ نظام پر عائد پابندیوں کو ختم کیا جائے کیوں کہ اس سے افغانستان بین الاقوامی معاشی نظام سے کٹ کر رہ گیا ہے۔ انہوں نے کہا کہ پابندیاں افغانستان کی معاشی ترقی میں رکاوٹ بن رہی ہیں جو ان کی حکومت کا ہدف ہے۔ ذبیح اللہ مجاہد نے خطاب میں کہا کہ وہ اس بات سے انکار نہیں کرتے بعض ممالک کو اسلامی امارات کے اقدامات سے پریشانی ہو سکتی ہے۔ انہوں نے امریکہ اور مغربی ممالک کی جانب سے ڈالے جانے والے دباؤ پر تنقید کی اور مطالبہ کیا کہ وہ افغانستان کے داخلی معاملات کو بین الاقوامی تعلقات سے الگ رکھیں۔ ذبیح اللہ مجاہد نے اپنے خطاب میں لڑکیوں کی تعلیم، خواتین کے روزگار یا ان پر سفر پابندیوں کا واضح الفاظ میں ذکر نہیں کیا بلکہ انہوں نے اسے ثقافتی، مذہبی اور پالیسی کا اختلاف قرار دیا۔