Raza Musani 
نیویارک : اقوام متحدہ کی سلامتی کونسل نے غزہ میں جنگ بندی کی حمایت کے لیے امریکی قرارداد منظور کرلی۔ سلامتی کونسل میں قرارداد کی حمایت میں چودہ ووٹ آئے۔ روس نے ووٹنگ میں حصہ نہیں لیا۔ اسرائیل اور حماس کے درمیان جنگ بندی کی اس تجویز کا مسودہ امریکی صدر جوبائیڈن نے منظور کیا تھا۔ پندرہ رکنی کونسل کے ارکان نے قرارداد کے مسودے پر ایک ہفتے تک بحث کی تھی. یہ گیارہواں موقع تھا جب سلامتی کونسل نےغزہ میں جنگ سے متعلق قرارداد کے مسودے پر ووٹ دیا تاہم صرف تین کی منظوری دی۔ قرارداد میں فریقین پر زوردیا گیا کہ وہ بلا تاخیر اور شرط کے قرارداد کو مکمل طور پرنافذ کریں۔ قرارداد کے مطابق دونوں متحارب فریق بات چیت کریں گے اور اس دوران جنگ بندی جاری رہے گی۔ حماس نے سلامتی کونسل کی قرارداد کا خیرمقدم کیا ہے حماس نے ایک بیان میں کہا کہ منصوبے کے اصولوں پر عمل درآمد کے لیے ثالثوں کے ساتھ تعاون کو تیار ہیں۔
