بیوٹمز یونیورسٹی میں ہزارہ طلباء کے ساتھ امتیازی سلوک کی شدید الفاظ میں مذمت

کوئٹہ : مجلس وحدت مسلمین بلوچستان کے جاری کردہ بیان میں بیوٹمز یونیورسٹی میں ہزارہ شیعہ قوم کے طلباء کے ساتھ امتیازی سلوک، تشدد اور نفرت انگیز رویہ کی شدید الفاظ میں مذمت کرتے ہوئے ذمہ داران کے خلاف کارروائی کا مطالبہ کیا گیا ہے۔ بیان میں کہا گیا کہ بیوٹمز یونیورسٹی کوئٹہ شہر میں معتبر تعلیمی اداروں میں سے ایک ہے، تعلیمی اداروں میں رنگ، نسل یا مذہب کی بنیاد پر نفرت پھیلانے اور طلباء کو تشدد کا نشانہ بنانے پر بیوٹمز انتظامیہ کی خاموشی قابل افسوس اور قابل مذمت ہے۔ ہم مطالبہ کرتے ہیں کہ واقعہ میں ملوث ذمہ داران کے خلاف جلد از جلد کارروائی کی جائے۔ بیان میں مزید کہا گیا کہ طلباء نے بعض عناصر کی نشاندہی کرتے ہوئے انتظامیہ کو آگاہ کیا ہے۔ مذکورہ عناصر نے سیاسی قائدین کے ساتھ بھی غیر مناسب رویہ اختیار کیا اور ہمارے مذہب و قوم کی توہین کی ہے۔ جس پر فقط ان عناصر کی برطرفی کافی نہیں ہے، بلکہ فرقہ واریت پھیلانے والے ایسے عناصر کے خلاف قانونی چارہ جوئی کرتے ہوئے ان کے خلاف مقدمہ ہونا چاہئے۔ بیان میں مزید کہا گیا کہ بیوٹمز یونیورسٹی کے ذمہ داران کی جانب سے سنجیدہ اقدامات نہ اٹھائے گئے، تو ہم احتجاج پر مجبور ہوں گے۔ ہم کبھی بھی اپنے حق سے دستبردار نہیں ہوئے ہیں، اور نہ مستقبل میں کسی فرقہ واریت اور امتیازی سلوک کو برداشت کریں گے۔