Raza Musani 
قاہرہ : مصر کے صدر عبدالفتاح السیسی نے خطے میں استحکام برقرار رکھنے کے لیے مشرق وسطیٰ کے مختلف بحرانوں کے حل کی ضرورت پر زور دیا ہے۔ انہوں نے غزہ جنگ بندی معاہدے پر تمام فریقوں سے عملدرآمد کا مطالبہ بھی کیا۔ عبدالفتاح السیسی نے یہ بات امریکی صدر ڈونلڈ ٹرمپ کے مشیر اور داماد جیرڈ کشنر سے ملاقات میں کہی۔ ملاقات میں مشرق وسطیٰ کی صورتحال اور فلسطینی مسئلے پر تبادلہ خیال کیا گیا۔ السیسی نے کہا کہ خطے اور عالمی سطح پر سلامتی و استحکام کے لیے مشترکہ چیلنجز سے نمٹنے کی کوششیں جاری رکھنا ضروری ہے۔ انہوں نے غزہ جنگ بندی معاہدے پر تمام فریقوں سے عمل کرنے پر زور دیا، جو اکتوبر 2025 کے شرم الشیخ امن سربراہی اجلاس میں طے پایا تھا۔ جیرڈ کشنر نے مصر اور امریکا کے درمیان قریبی رابطہ کاری کو سراہتے ہوئے علاقائی امن کے لیے صدر السیسی کی کوششوں کی تعریف کی۔ کشنر نے مصر کو مشرق وسطیٰ میں امریکا کا ایک اہم شراکت دار بھی قرار دیا۔
