داخلی خودمختاری اور استعمار کی غلامی کے خلاف جدوجہد میں تحریک انصاف کے ساتھ کھڑے ہیں، ایم ڈبلیو ایم

لاہور : چیئرمین پی ٹی آئی عمران خان نے چیئرمین ایم ڈبلیوایم علامہ راجہ ناصر عباس جعفری کو ٹیلیفون کرکے ان کا احوال پوچھا اور ان کی جلد صحت یابی کی دعا کے ساتھ ساتھ لانگ مارچ میں شرکت کی دعوت بھی دی۔ علامہ راجہ ناصر عباس نے عمران خان کا شکریہ ادا کیا اور کہا کہ وطن کے استحکام اور استقلال کی خاطر بیرونی طاقتوں کی غلامی سے نجات کا حصول ہمارے شہید قائد علامہ عارف حسین الحسینیؒ کی کی دیرینہ آرزو تھی ۔ ہم اپنے قائد شہید کے افکار ونظریات کی پیروی کرتے ہوئے وطن عزیز میں بیرونی مداخلت اور عدم استحکام کا راستہ روکنے کی ہر کوشش کا ساتھ دیں گے۔ انہوں نے لانگ مارچ میں شرکت کی دعوت کو قبول کرلیا اور کہاکہ ہم آزاد خارجہ پالیسی ، داخلی خودمختاری اور ملک دشمن استعماری قوتوں کی غلامی کے خلاف جدوجہد میں تحریک انصاف کے ساتھ کھڑے ہیں ، ہم حقیقی آزادی مارچ کی مکمل حمایت کرتے ہیں اور بھرپور شرکت کریں گے ۔