Raza Musani 
برسلز: یورپی یونین کی خارجہ پالیسی کے سربراہ جوزف بوریل نے کہا ہے کہ اسپین، آئرلینڈ اور یورپی یونین کے دیگر رکن ممالک 21 مئی کو فلسطینی ریاست کو تسلیم کرنے کا ارادہ رکھتے ہیں۔ اسپین کے وزیر اعظم پیڈرو سانچیز نے مارچ میں کہا تھا کہ اسپین اور آئرلینڈ نے سلووینیا اور مالٹا کے ساتھ مل کر اسرائیل کے ساتھ ساتھ فلسطینی ریاست کو تسلیم کرنے کے لیے پہلا قدم اٹھانے پر اتفاق کیا ہے اور وہ دو ریاستی حل کو دیرپا امن کے لیے ضروری سمجھتے ہیں۔ بوریل نے ایک ہسپانوی ریڈیو اسٹیشن کو بتایا کہ یورپ کے ان ملکوں کا فلسطینی ریاست کو تسلیم کرنا سیاسی نوعیت کا ایک علامتی عمل ہے۔ ان کے بقول یہ اقدام ایک ریاست سے زیادہ اس ریاست کے وجود کے عزم کو تسلیم کرنے کے لیے ہے۔انہوں نے کہا کہ بیلجیم اور دیگر ممالک شاید اس اقدام کی پیروی کریں گے۔ گزشتہ سال اکتوبر میں حماس کے اسرائیل پر حملے کے جواب میں غزہ میں اسرائیل کی جارحیت میں ہلاکتوں میں اضافے کے ساتھ ساتھ جنگ بندی اور فلسطین-اسرائیل تنازعہ کے مستقل خاتمے کے لیے بین الاقوامی مطالبات میں اضافہ ہوا ہے۔
