Raza Musani 
لاہور: معروف شاعر و ذاکر اہل بیت ؑ شہید محسن نقوی کے قاتل کو آزاد کروانے کیلئے کیس کا ریکارڈ غائب کرنے پر عدالت کا اظہار برہمی اور افسران کے خلاف مقدمہ درج کرنے کا حکم دے دیا۔ انسداد دہشت گردی عدالت لاہور میں ممتاز شاعر و ذاکر اہل بیت ؑ شہید محسن نقوی کے 26 سال پرانے قتل کیس کی سماعت ہوئی۔ انسداد دہشتگردی عدالت کے جج اعجاز احمد بٹر نے کیس کی سماعت کی۔ عدالت میں سی ٹی ڈی نے رپورٹ پیش کی کہ مقدمے کا ریکارڈ گم ہو چکا ہے، ہمارے افسران ریکارڈ تلاش کرنے میں ناکام رہے ہیں۔ عدالت نے ریکارڈ گم ہونے پر شدید برہمی کا اظہار کرتے ہوئے کہا کہ اتنے اہم کیس کا ریکارڈ گم ہونا تشویش ناک ہے۔عدالت نے ریکارڈ گم کرنیوالے افسران کیخلاف مقدمہ درج کرنے کا حکم دیدیا۔ عدالت نے ڈی آئی جی انویسٹی گیشن کو مقدمہ درج کرنے اس کی رپورٹ عدالت میں پیش کرنے کی ہدایت کی۔ 26 سال قبل لاہور کے علاقے اقبال ٹاؤن میں محسن نقوی کو دہشتگردوں نے فائرنگ کر کے شہید کر دیا تھا۔ مقدمے کے نامزد ملزم اور کئی پاکستانیوں کے قاتل دہشتگرد اکرم لاہوری نے بری کرنے کی درخواست دائر کر رکھی ہے۔
