Raza Musani 
دوحہ : حماس کے سربراہ شہید اسماعیل ہنیہ کو سوگواروں کی موجودگی میں دوحہ میں سپرد خاک کردیا گیا۔ شہید اسماعیل ہنیہ کہ نماز جنازہ قطر کے دارالحکومت دوحہ کی مسجد امام محمد بن عبدالوہاب میں ادا کی گئی۔ حماس کے متوقع سربراہ خالد مشعل سمیت دیگر رہنما۔ امیر قطر۔ ترکیہ اور ملائشیا کے وزرائے خارجہ شریک ہوئے۔ نماز جنازہ کی ادائیگی کے لیے ہزاروں سوگوار اشک بار آنکھوں اور آزادیٔ فلسطین کی جدوجہد کو جاری رکھنے کے عزم کے ساتھ مسجد میں جوق در جوق جمع ہوئے۔ سوگوار شہید کی میت کو نعرۂ تکبیر اللہ اکبر کے نعروں میں لیکر الوسیل کے قبرستان میں پہنچے۔ جہاں انہیں سپرد لحد کردیا گیا۔قرآنی آیات کی تلاوت سے فضا کو معطر کیا جاتا رہا ۔امیرِ قطر اور ترک وزیر خارجہ نے اسماعیل ہنیہ کی میت کے نزدیک کھڑے ہوکر دعائے مغفرت کی اور حماس رہنما خالد مشعل سے تعزیت کا اظہار کیا۔
