سیکیورٹی ملے گی نہ اضافی رقم، ضمنی انتخابات کھٹائی میں پڑگئے

اسلام آباد: پنجاب، خیبرپختونخوا اسمبلی اور قومی اسمبلی کے ضمنی الیکشن کھٹائی میں پڑگئے۔ فوج، محکمہ دفاع اور پولیس نے نفری فراہم کرنے سے معذرت کرلی ہے جبکہ وزارت خزانہ نے اضافی فنڈز کی فراہمی سے انکار کردیا۔ جنرل ہیڈ کوارٹرز نے وزارت داخلہ کو بھیجے گئے مراسلے میں مؤقف اختیار کیا ہے کہ قومی اسمبلی کے 64 حلقوں اورصوبوں میں انتخابات کےلیے اہلکاروں کی تعیناتی ممکن نہیں ہے۔ الیکشن کیلئے پاک فوج، رینجرز اور ایف سی کے دستے فراہم نہیں کئے جاسکتے۔ وزارت دفاع نے بھی خیبر ضمنی انتخابات کے لیے رینجرز اور ایف سی کی فراہمی سے معذرت کر لی اور واضح کیا کہ مسلح افواج اور سول آرمڈ فورسز بارڈر اور اندرونی ملک سیکیورٹی میں مصروف ہیں۔اس سے پہلے محکمہ پولیس نے بھی نفری دینے سے انکار کردیا تھا۔ اُدھر وزارت خزانہ نے الیکشن کمیشن کو اضافی گرانٹ دینے سے معذرت کرلی اور واضح کیا کہ ملک کی معاشی صورتحال بہتر ہونے تک اضافی ضمنی گرانٹ کے مطالبے کو موخر کیا جائے۔