اسرائیل سے تعلقات، سعودی ولی عہد محمد بن سلمان کو جان کے لالے پڑگئے، قتل کا خدشہ

ریاض :سعودی ولی عہد محمد بن سلمان نے اپنے قتل کے خدشات ظاہر کردئے۔ امریکی ویب سائٹ پولیٹکو کے مطابق سعودی ولی عہد نے امریکی ارکان کانگریس کو بتایا کہ وہ اسرائیل کے ساتھ تعلقات کو معمول پر لانے کی سودے بازی میں اپنی زندگی داؤ پر لگارہے ہیں۔ سعودی ولی عہد نے مصر کے مرحوم رہنما انورالسادات کے قتل کا حوالہ دیتے ہوئے کہا کہ انہوں نے بھی اسرائیل کے ساتھ امن معاہدہ کیا تھا۔ امریکا نے سادات کو بچانے کےلیے کیا کیا؟۔ محمد بن سلمان نے ان خطرات پر بھی تبادلہ خیال کیا جن کا سامنا انہیں یہ بتانے میں ہے کہ کسی بھی معاہدے میں فلسطینی ریاست کے لیے حقیقی راستہ کیوں شامل ہونا چاہیے۔ بالخصوص ایسی صورت میں جبکہ غزہ پر اسرائیلی حملے کے بعد عرب دنیا میں اسرائیل کے حوالے سے غیض و غضب پایا جاتا ہے۔