سعودی عرب کا ایئربیس دینے سے انکار، امریکا ہرمز میں آپریشن روکنے پر مجبور

ریاض : سعودی عرب کے فضائی حدود اور پرنس سلطان ایئربیس کے استعمال کی اجازت دینے سے انکار پر امریکی صدر ٹرمپ کو آبنائے ہرمز میں آپریشن روکنا پڑا۔ امریکی ٹی وی این بی سی نیوز کی رپورٹ کے مطابق امریکی صدر ڈونلڈ ٹرمپ نے آبنائے ہرمز میں بحری جہازوں کی حفاظت کے لیے شروع کیے گئے پروجیکٹ فریڈم کو سعودی دباؤ پر معطل کیا۔ امریکی حکام کے مطابق ٹرمپ نے سعودی ولی عہد محمد بن سلمان سے رابطہ بھی کیا تاہم کوئی پیش رفت نہ ہو سکی۔ ایک امریکی عہدیدار نے بتایا کہ خطے کے جغرافیے کے باعث فوجی کارروائیوں کے لیے اتحادی ممالک کی فضائی حدود ناگزیر ہوتی ہیں۔ امریکی فوجی طیارے سعودی فضائی حدود کے ذریعے آبنائے ہرمز میں جہازوں کو فضائی تحفظ فراہم کر رہے تھے۔ ادھر ایک اور رپورٹ میں بتایا گیاہےکہ کویت نے بھی اپنے اڈوں اور فضائی حدود تک امریکی رسائی منقطع کر دی ہے۔