عراق سے داغے گئے 3 ڈرون تباہ کردئے، سعودی دعویٰ

ریاض : سعودی وزارتِ دفاع نے کہا ہے کہ عراق سے داغے گئے تین ڈرون سعودی فضائی حدود میں داخل ہونے کے بعد تباہ کر دیے گئے۔ سعودی وزارتِ دفاع کے ترجمان میجر جنرل ترکی المالکی نے بتایا کہ سعودی عرب اپنی قومی سلامتی، خودمختاری اور سرزمین پر موجود شہریوں اور رہائشیوں کے تحفظ کے خلاف کسی بھی خطرے کو ہرگز برداشت نہیں کرے گا۔ بیان میں کہا گیا کہ مملکت مناسب وقت اور مناسب مقام پر جواب دینے کا حق محفوظ رکھتی ہے۔ سعودی حکام نے واضح کیا کہ دفاعی فورسز مکمل طور پر چوکس ہیں اور کسی بھی ممکنہ حملے یا دراندازی سے نمٹنے کے لیے تمام ضروری عملی اقدامات کیے جائیں گے۔ واقعے کے بعد خطے میں سکیورٹی خدشات اور کشیدگی میں مزید اضافے کا امکان ظاہر کیا جا رہا ہے۔