روس کا یوکرین پر حملہ، بیرونی مداخلت پر سخت جواب دیا جائے گا، پیوٹن

ماسکو :روس نے یوکرین پر حملہ کر دیا، جس کے بعد یوکرین کے دارالحکومت کیف میں دھماکے سنے گئے ہیں۔ یوکرینی شہر ماریوپول میں بھی دھماکوں کی آوازیں سنائی دے رہی ہیں، یوکرین نے اپنی فضائی حدود بند کر دی ہیں۔روسی صدر ولادیمیر پیوٹن نے یوکرین پر خصوصی فوجی آپریشن کا اعلان کرتے ہوئے یوکرین کی فوج سے ہتھیار ڈالنے کا مطالبہ کیا ہے۔ صدر پیوٹن نے ٹیلی ویژن سے خطاب میں دھمکی دی کہ بیرونی مداخلت ہوئی تو روس جواب دے گا۔ روس کو یوکرین کی جانب سے لاحق خطرات کے باعث یوکرین میں فوجی کارروائی کی جائے گی۔ پیوٹن کے مطابق یہ فوجی آپریشن یوکرین کی دھمکیوں کے جواب اور اسلحے سے پاک خطے کے لیے ہے۔ روس یوکرین پرقبضہ نہیں کرنا چاہتا۔ کارروائی میں ہونے والے خون خرابے کی ذمہ داری یوکرین پرعائد ہوگی۔ صدر پیوٹن نے خبردارکیا کہ کسی نے روس کی فوجی کارروائی میں مداخلت کی کوشش کی تو اس کے نتائج اتنے سنگین ہوں گے جوپہلے کبھی کسی نے نہیں دیکھے ہوں گے۔ روسی صدرنے الزام عائد کیا کہ امریکا اوراس کے اتحادیوں نے روس کے اس مطالبے کونظرانداز کیا کہ وہ یوکرین کو نیٹو کا حصہ بننے سے روکیں اوراس سلسلے میں ماسکوکو سیکیورٹی گارنٹی دی جائے۔