امریکا یورپ سے اپنے ایٹمی ہتھیاروں کے انخلا کو یقینی بنائے، روس کا مطالبہ

ماسکو: روس نے یورپ سے امریکی جوہری ہتھیاروں کے انخلا کا مطالبہ کرتے ہوئے اسے علاقائی سلامتی کے لیے ضروری قرار دیا ہے۔ روس کے سینئر سفارتکار نے کہا ہے کہ یورپ سے امریکی جوہری ہتھیاروں کا انخلا علاقائی سلامتی کو مضبوط بنانے میں مددگار ثابت ہوگا۔ انہوں نے کہا کہ غیر جوہری یورپی ممالک، بشمول فن لینڈ، میں ایٹمی ہتھیاروں کی تعیناتی روس کی قومی سلامتی کے لیے خطرات پیدا کر رہی ہے۔ انہوں نے مزید کہا کہ اگر امریکا اپنے جوہری ہتھیار یورپ سے واپس لے جائے اور غیر جوہری ممالک اپنی ایسی خواہشات ترک کر دیں تو اس سے خطے میں استحکام بڑھے گا۔
اس سے قبل روسی سفارتکار نے خبردار کیا تھا کہ فرانس کی جانب سے مشرقی یورپ تک جوہری چھتری پھیلانے کی باتیں معاہدہ عدم پھیلاؤ جوہری ہتھیار کو کمزور کر سکتی ہیں۔ انہوں نے کہا کہ یورپ میں جوہری سرگرمیوں میں اضافہ دیگر ممالک کو بھی ایسے ہتھیار بنانے کی طرف مائل کر سکتا ہے۔ انہوں نے مزید کہا کہ فرانس اور پولینڈ کی مشترکہ جوہری مشقیں اور فن لینڈ کی جانب سے ایٹمی ہتھیاروں کی میزبانی کی تیاری، روس اور نیٹو کے بنیادی معاہدوں سے متصادم ہے۔