فلسطینیوں کی حمایت میں دنیا بھر میں احتجاجی مظاہرے اور ریلیاں

لندن : غزہ جنگ کو ایک سال پورے ہونے پر امریکا اور برطانیہ سمیت کئی ممالک میں مظاہرے کئے گئے اور ریلیاں نکالی گئیں۔ وسطی لندن میں چالیس ہزار سے زائد مظاہرین بیڈ فورڈ اسکوائر پر جمع ہوئے اور رسل اسکوائر تک مارچ کیا۔ پولیس نے پندرہ مظاہرین کو گرفتار کرلیا۔ امریکا میں نیویارک ، شکاگو، لاس اینجلس سمیت کئی امریکی شہروں میں بڑے مظاہرے کئے گئے۔ واشنگٹن میں وائٹ ہاؤس کے قریب بھی احتجاج کیا گیا۔
کینیڈا، فلپائن۔ جنوبی افریقا۔ فرانس، وینزویلا، لبنان۔ اسپین۔ہالینڈ اور دیگر ممالک میں بھی فلسطینیوں سے اظہار یکجہتی کیا گیا۔ منیلا اور جکارتہ میں امریکی سفارتخانے کے سامنے احتجاج کیا گیا۔ اطالوی دارالحکومت روم میں چھ ہزار سے زائد مظاہرین نے شہر کے مرکز میں مارچ کیا۔ پولیس سے جھڑپوں کے بعد کئی مظاہرین کو گرفتار کرلیا گیا۔
جرمنی کے دارالحکومت برلن میں بھی پابندی کی خلاف ورزی کرتے ہوئے ریلی نکالی گئی۔ پولیس نے مظاہرین کو منتشر کرنےکیلئے تشدد کیا اور پندرہ مظاہرین کو گرفتار کرلیا۔ مظاہرین نے جنگ بندی اور اسرائیل کو اسلحہ کی فراہمی روکنے کا مطالبہ کیا۔